Framkoma formannsins ógeðfelld

Varaformaður fjárlaganefndar segir framkomu formanns Öryrkjabandalagsins ógeðfellda og að ríkisstjórnin hafi efnt að fullu samkomulag sitt við það. Formaður Öryrkjabandalagsins segir svo ekki vera og ætlar að stefna ríkisstjórninni fyrir dómstóla verði ekki staðið við samkomulagið í haust. Öryrkjabandalagið telur að ríkisstjórnin hafi ekki staðið við samkomulag sem gert var í fyrra um róttækar breytingar á örorkubótum. Heilbrigðisráðherra varði einum milljarði til málsins í fyrrahaust en útreikningar sýndu að heildarkostnaður við breytingarnar væri einn og hálfur milljarður. Formaður Öryrkjabandalagsins segir að verði ekki staðið við samkomulagið að fullu á næstunni þá verði ríkisstjórnin dregin fyrir dómstóla. Einar Oddur Kristjánsson, varaformaður fjárlaganefndar, segir ríkisstjórnina hafa staðið við samkomulagið að fullu. Talað hafi verið um að verja einum milljarði til þessa máls og það hafi verið gert. Einar segir það ákaflega ógeðfellt að vera með brigslyrði um svik á hendur ríkisstjórninni, ár eftir ár, líkt og formaður Öryrkjabandalagsin geri. Hann segir formanninn einfaldlega eiga að leggja fram ákærur, telji hann sig hafa verið svikinn   Af orðum Jóns Kristjánssonar í hádegisfréttum Ríkisútvarpsins í fyrra, nánar tiltekið 27. nóvember, má sjá að hann telur samkomulagið ekki uppfyllt að fullu. Hann sagði meðal annars: „Síðan kom í ljós seinna, nokkrum mánuðum seinna, að þetta var dýrara og ég stefni að því að ljúka, að fullnusta samkomulagið eftir 12 mánuði. En það hefur aldrei staðið neitt annað til frá minni hálfu heldur en standa við það.“ Varaformaður fjárlaganefndar segir það ofureðlilegt að einstakir ráðherrar hafí „sínar meiningar, sínar óskir og sína drauma um að efla og auka það sem þeir eru að vinna að, en það er ein ríkisstjórn í landinu.“