Evrópa er vaxtarsvæði Samherja

Samherji keypti í vikunni ráðandi hluti í sjávarútvegsfyrirtækjum í Bretlandi og Þýskalandi. Kaupverðið var nálægt tveimur og hálfum milljarði króna. Þar með á Samherji fjögur útgerðarfélög innan Evrópusambandsins, tvö í Bretlandi, eitt í Póllandi og eitt í Þýskalandi. Starfsmenn félaganna fjögurra eru á annað hundrað, þau gera út fimm skip og eru með tæplega þriggja milljarða króna ársveltu. Félögin eiga tuttuguþúsund tonna þorskígildiskvóta í sameiginlegum kvóta Evrópusambandsins. Við það verður Samherji langstærsta útgerðarfélag landsins með rúmlega fjörutíuþúsund þorskígildistonna kvóta, þar af rúmlega 25 þúsund þorskígildistonn á Íslandsmiðum. HB Grandi er stærsta útgerðarfélagið innanlands með tæp 28 þúsund þorskígildistonn en engan kvóta í Evrópusambandinu. Fjárfestingar Samherja í Evrópu eru ekki nýjar af nálinni. Finnbogi Jónsson, stjórnarformaður fyrirtækisins, segir að fjárfestingar félagsins í Evrópu megi rekja um áratug aftur í tímann. Frekari fjárfestingar þar séu fyrirhugaðar, þá í sölufyrirtækjum og fiskvinnslu. Aðspurður um ástæðu þess að félagið leiti út fyrir landsteinana segir hann að Samherji hafi náð svokölluðu kvótaþaki hér innanlands. Það þýðir að félagið megi ekki safna meiri kvóta í íslenskri landhelgi á sínar hendur vegna takmarkana í lögum. Þetta sé því eina leiðin fyrir félagið til að vaxa. Kvótaþak er ekki fyrir hendi innan Evrópusambandsins, en þrátt fyrir það hyggja forsvarsmenn félagsins ekki á frekari kaup á útvegsfyrirtækjum. Friðrik segir það á margan hátt svipað að standa í útgerð í Evrópusambandinu og hér á landi. Það sé kominn vísir að kvótakerfi innan sambandsins og því sé hægt að gera áætlanir fram í tímann. Hann segir rekstrarliði marga þá sömu en engu að síður sé óhagstæðara að gera út frá Íslandi en Bretlandi, þar sem kostnaður sé lægri. Samherji njóti þó ekki margumræddra styrkja Evrópusambandsins, enda stundi skip félagsins úthafsveiðar sem falla ekki undir styrkjakerfið.