Sniðugur hlébarði

Starfsmönnum dýragarðs í Tel Aviv í Ísrael hefur tekist að leysa gátuna um dularfullan flótta hlébarða eins. Hlébarðinn sem er fjögurra ára af persnesku kyni og nýkominn í garðinn, hefur reglulega horfið úr búri sínu, þrátt fyrir að vera vandlega lokaður inni. Til að leysa gátuna komu starfsmennirnir fyrir njósnamyndavélum. Í ljós kom að hlébarðinn beitti mikilli lagni við að lyfta hlera á búrinu og mjakaði sér síðan út þegar hann var viss um að leiðin væri greið og naut lífsins á æfingasvæði utan við búrið þar sem mun meira pláss var til að láta fara vel um sig. Þrátt fyrir að dýrið hafi þannig sloppið úr búrinu voru gestir ekki í neinni hættu, því æfingasvæðið er vandlega girt. En nú þegar upp hefur komist um strákinn Tuma, er líklegt að endir hafi verið bundinn á ferðir hans.