Útseld vinna aukin á LSH

Jóhannes M. Gunnarsson, settur forstjóri Landsspítala - háskólasjúkrahúss segir að spítalinn muni leita leiða til að auka útselda þjónustu, innan þeirra marka sem heimildir leyfi. Samkvæmt sjö mánaða rekstraruppgjöri er spítalinn kominn 139 milljónir umfram fjárheimildir tímabilsins eða 0,9%. Launagjöld eru 0,6% umfram áætlun og rekstrargjöld 1,9% umfram áætlun. Kostnaður við S-merkt lyf er 2,4% umfram áætlun. Rekstur flestra sviða eru innan áætlunar. Þegar kostnaðarliðir eru bornir saman við fyrra ár kemur í ljós að kostnaður við lækninga-, og hjúkrunarvörur eykst um 8,1% á milli ára og rannsóknarvörur hækka um 4,3%. Kostnaður vegna S-merktra lyfja eykst um 12,4% en lækkar vegna annarra lyfja um 1,6%. Skurðaðgerðum heldur áfram að fjölga. Aukningin var 2,9% á fyrstu sjö mánuðum ársins. Aukningin var mest í dagdeildaraðgerðum á augum en þar hefur eftirspurnin vaxið hvað mest. Einnig jukust aðgerðir í almennum skurðlækningum, augnlækningum, barnaskurðlækningum, bæklunarlækningum, þvagfæraskurðlækningum og æðaskurðlækningum. Í næsta hefti Stjórnunarupplýsinga verður birt þróun biðlista eftir þjónustu spítalans. Legudögum á bráðadeildum hefur fækkað um 7,1%. Sjúklingum á gjörgæsludeildum fjölgar umtalsvert, eða um nær 30% en legudögum fjölgar um 7% þar. Meðallegutími á gjörgæsludeildum styttist úr 2,9 dögum í 2,4 daga. Meðallegutími á spítalanum í heild styttist úr 8,9 dögum í 8,2 daga. Ef aðeins er litið til meðallegutíma á bráðadeildum sjúkrahússins þá styttist hann úr 5,1 dögum í 5,0 daga. Varðandi útselda þjónustu spítalans sagði Jóhannes forráðamenn spítalans telja þjóðhagslega hagkvæmt að auka hana. Mikilvægt væri að reyna að nýta afkastagetu tækja og þess mikla búnaðar sem á spítalanum væri eins mikið og mögulegt væri. Varðandi fyrirhugaðan frekari niðurskurð um 700 milljónir króna sagði Jóhannes, að vel hefði tekist til á þessu ári. Reynt yrði að ná frekari sparnaði, en ef ná ætti rekstrinum niður um aðrar 7 - 800 milljónir, eins og stjórnvöld hefðu lagt upp með á síðasta ári, þá kæmi það verulega niður í þjónustumagninu. "Starfsmenn eru að leggja meira á sig en áður," sagði hann "og sumstaðar er það á ystu mörkum."