Sjóðurinn væri 8,4 milljarðar

Menningar- og samfélagssjóður sem fyrirhugað var að stofna við kaup KB banka á Spron væri að verðmæti 8,4 milljarðar nú ef viðskiptin hefðu gengið eftir. Mestu munar um hækkun bréfa KB banka en sjóðurinn hefði átt tvo milljarða í þeim. Restin var í skuldabréfum sem hafa gefið góða ávöxtun frá áramótum. Sjóðurinn hefði við stofnun orðið sex milljarðar króna. Alþingi stöðvaði viðskiptin með lagasetningu og því varð ekkert af sjóðnum. Pétur Blöndal greiddi atkvæði gegn frumvarpinu. Hann segir að varlega beri að fara í slíka útreikninga á sjóðnum. Árferði á verðbréfamörkuðum hafi verið mjög gott. "En hafi sjóðurinn getað úthlutað 300 milljónum króna á ári við stofnun, þá ætti hann að geta skilað enn meiru nú." Pétur óttast að sparisjóðirnir muni eiga erfitt með að keppa um nýju húsnæðislánin. "Þeir segja að meðan þeir geti notað innlánin til þess þá sé það í lagi, en þeir bara geta það ekki. Það sem mun gerast er að menn munu breyta úr dýrum lánum í þessi nýju lán." Pétur óttast því að smærri fyrirtæki verði undir í samkeppni og stóru bankarnir vinni til sín viðskiptin. Þegar innlánum sleppir verða fjármálastofnanir að fjármagna lánin með skuldabréfaútgáfu. Reglan er sú að minni fjármálstofnanir eru með mun hærra álag á skuldabréf sín en þær stærri. Þannig má gera ráð fyrir að fjárfestar leggi 0,3 prósentustig á bréf KB banka og Íslandsbanka frá ávöxtunarkröfu á ríkistryggð bréf. Ávöxtunarkrafan í síðasta útboði Íbúðalánasjóðs var 3,77. KB banki og Íslandsbanki fengju samkvæmt því kjörin 4,07. Aðrir þyrftu að borga hærra álag. Einar Oddur Kristjánsson var einn flutningsmanna sparisjóðafrumvarpsins. Hann telur enga ástæðu til að snúa til baka. "Þeir sem eru í viðskiptum verða alltaf að aðlaga sig nýjum aðstæðum. Ég vona svo sannarlega að sparisjóðirnir geri það," segir Einar Oddur.