Umsækjendur til Hæstaréttardómara

Sjö sóttu um embætti hæstaréttardómara í stað Péturs Kr. Hafsteins sem senn lætur af embætti. Fjórir þeirra sóttu um stöðu dómara í fyrra. Dómsmálaráðherra skipar í stöðuna að fenginni umsögn Hæstaréttar. Þeir sem sækja um embætti hæstaréttardómara eru: Allan Vagn Magnússon, héraðsdómari, Eggert Óskarsson, héraðsdómari, Eiríkur Tómasson, prófessor, Hjördís Hákonardóttir, dómstjóri, Jón Steinar Gunnlaugsson, prófessor og hæstaréttarlögmaður, Leó E. Löve, hæstaréttarlögmaður Stefán Már Stefánsson, prófessor. Allan Vagn, Eggert, Eiríkur og Hjördís sóttu öll um dómarastöðu í fyrra þegar Ólafur Börkur Þorvaldsson var skipaður og dró sú skipan dómsmálaráðherra mikinn dilk á eftir sér. Bæði taldist dómsmálaráðherra hafa brotið jafnréttislög og einnig taldi Umboðsmaður Alþingis vinnubrögð ráðherra aðfinnsluverð. Hæstiréttur taldi aðra umsækjendur hæfari en Ólaf Börk, en ráðherra hafði þá skoðun réttarins að engu. Það er altalað innan lögmannastéttarinnar að dómurum Hæstaréttar hafi orðið um og ó, þegar þeir fregnuðu að Jón Steinar Gunnlaugsson hefði sótt um stöðuna, en hann hefur mjög látið til sín taka í þjóðmálaumræðu síðustu ára og meðal annars deilt á dóma Hæstaréttar. Heimildir fréttastofu herma að í kjölfarið hafi verið hafin leit að manni sem væri óumdeildur og erfitt yrði að ganga fram hjá. Sá maður sem hafi fundist væri Stefán Már Stefánsson, en hann hefur um langt árabil verið virtur lagaprófessor við Háskóla Íslands og gefið út fjölda bóka og rita, meðal annars um Evrópusambandið og hlutafjárlög. Þá segja flestir lögmenn að Eiríkur Tómasson sé afar óumdeildur og virtur fræðimaður. Hins vegar kom það flestum þeim sem fréttastofa ræddi við á óvart að Eiríkur skyldi sækja um að nýju eftir að hafa verið hafnað í fyrra.