Kvenfangar verr staddir

Konur sem afplána fangelsisdóm eru almennt verr staddar en karlfangar. Þetta kemur fram í nýrri rannsókn á félagslegri stöðu fanga á Íslandi sem Margrét Sæmundsdóttir, deildarstjóri hjá Fangelsismálastofnun, gerði en þetta er fyrsta könnun sinnar tegundar sem gerð er hér á landi. Rannsóknin náði til fanga sem hófu afplánun frá september 1998 til ársloka 2003 og voru einungis íslenskir fangar í úrtakinu. Margrét segir niðurstöðuna benda til þess að fangar komi frá efnaminni fjölskyldum. Það eigi þó frekar við um eldri fanga því þeir yngri komi úr mun fjölbreytttari fjölskylduaðstæðum en hinir eldri. Einnig hafi þeir flestir mjög litla menntun og nokkra athygli vekur að flestir fanganna voru í vinnu þegar afplánun hófst. Rannsóknin sýndi að félagsleg staða kynjanna var ólík. Margrét segir að fleiri konur hlutfallslega, af þeim sem koma inn í fangelsi, séu verr staddar en karlmenn, félagslega og andlega. Stærri hluti þeirra sé öryrkjar, atvinnulausar og tali um að þær eigi við geðræn vandamál að stríða. Þá er hátt hlutfall þeirra ekki með barn sitt í sinni umsjá. Margrét segir erfitt að finna einhlíta skýringu á hinni misjöfnu stöðu kynjanna í hópi fanga. Samkvæmt rannsókninni er ákveðið samhengi á milli menntunar, bakgrunns og félagslegrar stöðu fanganna og þeirra afbrota sem þeir eru að afplána dóm fyrir. Innbrotsþjófar, sem dæmi, voru félagslega verra staddir en margir aðrir, þeir voru í meira mæli atvinnulausir, verr menntaðir, höfðu hlotið erfiðara uppeldi og voru frekar í vímuefnaneyslu. Fjársvikamenn og kynferðisbrotamenn voru almennt með lengra nám að baki, voru í vinnu, áttu sér samastað og fjölskyldu. Aðspurð að hvaða gagni þessi rannsókn komi segir Margrét að niðurstöðurnar gagnist við að greina hvaða meðferð fangar þurfi. Hvort meðferðin skili árangri sé svo aftur á móti annað mál. Nánar verður fjallað um þetta mál í fréttum Stöðvar 2 í kvöld. Hægt er að hlusta á viðtal við Margréti Sæmundsdóttur úr hádegisfréttum Bylgjunnar með því að smella á hlekkinn hér að neðan.