Forsetinn villti á sér heimildir

Ólafur Ragnar Grímsson, forseti Íslands, sagði í upphafi vinum Dorritar Moussaief að hann væri stjórnunarsérfræðingur til að leyna því hver hann var í raun og veru. Þetta kemur fram í ítarlegri grein um Dorrit sem birtist í breska dagblaðinu The Sunday Times í dag og þar kennir ýmissa forvitnilegra grasa. „Ísdrottningin er mætt“ er yfirskrift greinarinnar sem fjallar um lífshlaup Dorritar frá unga aldri. Í greininni kemur fram að Ólafur Ragnar hafi gengið á eftir Dorrit með grasið í skónum og fyrst haft erindi sem erfiði eftir að hann bjargaði henni úr klóm tollgæslunnar í Bandaríkjunum. Eftir það var ekki aftur snúið en í eitt ár reyndu þau sitt ítrasta til að leyna sambandi sínu. „Slys eða slysið eins og Íslendingar kalla atvikið“, segir í greininni, „varð til að breyta því“. Þá er vísað til hestaslyssins margfræga þegar Ólafur Ragnar handleggsbrotnaði.  Dorrit segir sjálf að á þeim tíma hafi Ólafur Ragnar verið orðin leiður á því að hún var ætíð annað hvort talin vera skiptinemi eða vinkona dætra hans svo að lokum varð sambandið opinbert og parið trúlofaðist. Þá tók við tveggja ára trúlofun og í greininni segir að margir Íslendingar hafi verið orðnir nær úrkula vonar um að þau myndu á endanum giftast. Það sem réð úrslitum var afmælisgjöf Dorritar til Ólafs Ragnars þegar hann varð sextugur. Hún gaf honum armbandsúr sem honum líkaði ekki við. Hún spurði þá hvað hann vildi fá og hann svaraði því til að helst vildi hann að hún játaðist honum í hjónabandi og það varð úr. Blaðamaður Sunday Times fjallar ítarlega um tengslanet Dorritar og því er haldið fram að hún þekki nánast alla sem eru þess virði að þekkja; Bill Gates, Bill Clinton, Sean Connery, Michael Caine og Michael Bloomberg svo örfáir séu nefndir. Blaðið gerir því skóna að þessi gríðarmiklu tengsl Dorritar séu afar mikilvæg fyrir Ísland og í sameiningu séu Dorrit og Ólafur Ragnar gríðarlega áhrifamikið par. Dorrit segir sjálf að hún líti svo á að hennar hlutverk sem forsetafrú sé að vekja athygli á landinu. En ekki eru allir eins hrifnir. Blaðið vitnar í íslenskan rithöfund sem ekki vill láta nafns síns getið sem nefnir það að Dorrit sé gyðingur og sterkefnuð en segir svo að það skipti kannski ekki öllu máli, svo lengi sem hún borgi skatta á Íslandi.