Eiríkur og Hjördís sækja um

Eiríkur Tómasson, sem Hæstiréttur taldi í fyrra heppilegan til að gegna stöðu hæstaréttardómara, sækir aftur um stöðuna nú. Það gera líka Hjördís Hákonardóttir og Allan Vagn Magnússon. Jón Steinar Gunnlaugsson, hæstaréttalögmaður og lagaprófessor, hafði þegar skilað inn umsókn um stöðu Hæstaréttardómara í síðustu viku. Þrátt fyrir að Jón Steinar hafi verið duglegur að gagnrýna Hæstarétt í gegnum tíðina hafa margir í lögmannastétt talið víst að hann fengi stöðuna nú og nánast óþarft fyrir aðra að sækja um. Jón Steinar Gunnlaugsson sagði hinsvegar á Bylgjunni í hádeginu að hann hefði ekki rætt umsókn sína við dómsmálaráðherra og ef hann ætti að fá stöðuna þá vissi hann ekki af því. Eiríkur Tómasson lagaprófessor, Hjördís Hákonardóttir dómstjóri og Allan Vagn Magnússon héraðsdómari eru öll á meðal umsækjenda en frestur til að sækja um stöðuna rennur út í dag og því kunna fleiri að bætast í hópinn. Eiríkur og Hjördís sóttu um stöðu hæstaréttardómara í fyrra en þá skipaði Björn Bjarnason dómsmálaráðherra Ólaf Börk Þorvaldsson í embættið. Þá var Eiríkur annar þeirra sem Hæstiréttur taldi heppilegastan í stöðuna en hinn var Ragnar Hall, sem gagnrýndi á dögunum í fréttum Stöðvar 2 hvernig staðið var að málum í fyrra. Hjördís Hákonardóttir var síðan talin hæfari en Ólafur Börkur til að gegna stöðunni af Kærunefnd jafnréttismála sem taldi dómsmálaráðherra hafa brotið jafnréttislög með stöðuveitingunni.