Spurlock við frumsýningu

Morgan Spurlock var nær dauða en lífi eftir að hafa lifað eingöngu á McDonalds-hamborgurum í heilan mánuð í fyrra. Hann segir að reynsla sín hafi orðið til að ýta við fólki og það hugsi meira en áður um hvað það setur ofan í sig og börn sín. Kvikmynd um tilraun Spurlocks hefur vakið heimsathygli og verður frumsýnd hér á landi í kvöld, Spurlock sjálfur verður viðstaddur frumsýninguna. Spurlock segist hafa verið 14 mánuði að ná fyrri heilsu. Mynd hans, "Super Size Me", er opnunarmynd bandarísku kvikmyndahátíðarinnar sem hefst í dag og stendur til 6. september. Spurlock segir talsmenn McDonalds hafa reynt að kasta rýrð á myndina. Hann segir að talsmenn McDonalds tali aldrei um það, að borði maður matinn þeirra veikist maður síðar meir. Borði maður mikið af slíkum mat hækkar kólesterólið, blóðþrýstingurinn hækkar, hjarta og lifrarsjúkdómar gera vart við sig auk sykursýki. Hann segir að allt sem hafi hent sig í myndinni geti hent aðra, en það tali þeir aldrei um. McDonalds hefur að undanförnu keyrt öfluga aglýsingaherferð í fjölmiðlum þar sem lögð er áhersla á hollan og nýjan matseðil. Spurlock segir það ótrúlega tilviljun að slíkur matseðill komi á markað um leið og frumsýna eigi mynd sína. Hann segist hafa farið inn á veitingastað McDonalds og beðið um upplýsingar um næringarefni. Þær hafi ekki verið til á staðnum. Spurlock gefur ekki mikið fyrir þessa nýju línu fyrirtækisins. Hann mælir heldur með að fólk fari þar inn, kaupi vatnsflösku og fari rakleiðis út aftur. Spurlock segir tilgang myndarinnar hafa verið að hreyfa við fólki og að það hafi tekist. Hann segir fólk ganga út af myndinni og hugsa með sér að það þurfi að fara betur með sig, elda meira fyrir börnin sín og vera þeim betri fyrirmynd. Hann vill sjá að fólk axli ábyrgð á lífi sínu.