Heilsa Davíðs batnaði stórlega

Clinton-hjónin heimsóttu Davíð Oddsson forsætisráðherra og Ástríði eiginkonu hans á heimili þeirra í Skerjafirði síðdegis. Davíð sagði heimsóknina hafa verið svo skemmtilega að heilsan hefði batnað stórlega. Hillary Clinton öldungadeildarþingmaður lofaði efnahagsstefnu Davíðs sérstaklega. Clinton-hjónin heilsuðu Davíð innilega en þau þekkjast ágætlega frá fyrri tíð. Fundurinn varð lengri en áætlað var og sagði Davíð eftir fundinn að honum hefði flogið fram í bata, svo ánægjulegt hefði verið að fá þau í heimsókn. Bill Clinton sagði það gleðja sig að heimsækja forsætisráðherrahjónin og að sér væri heiður að koma inn á þeirra fallega heimili. „Ég er mjög þakklátur fyrir þá vináttu sem forsætisráðherrann og þjóðin öll hafa sýnt mér, Hillary og Bandaríkjunum mörg undanfarin ár, áður en ég varð forseti og eftir að ég lét af embætti,“ sagði Clinton. Hann snéri sér svo að Davíð og sagðist ekki trúa því að hann hafi verið veikur. Davíð virðist hafa farið mjög hratt fram að sögn Clintons sem fannst hann mjög hraustlegur.  Varnarmálin voru ekki rædd í þessarri heimsókn og sagði Davíð Oddsson að hann teldi ekki viðeigandi að ræða þau mál við aðra en núverandi ríkisstjórn. Hillary Clinton öldungardeildarþingmaður hafði hins vegar rætt þau mál við aðra fulltrúa ríkisstjórnarinnar fyrr í dag. Hún sagði að verið væri að vinna í þeim og vildi þakka forsætisráðherra fyrir þá forystu sem hann hefði veitt í stuðningi sínum við Bandaríkin.„Hann og ríkisstjórn hans hafa verið mjög staðföst í uppbyggingu á sjálfbærum efnahag og sjálfbærri framtíð í orkumálum fyrir Ísland sem ég tel að geti haft áhrif í Bandaríkjunum. Við áttum mjög góðan fund með utanríkisráðherranum í Bláa lóninu í dag þar sem við lærðum mikið um vetnisverkefnið,“ sagði Hillary. Hillary sagði stöðu varnarmála einnig hafa verið rædda og að sendinefndin hafi fengið að heyra sterkar skoðanir ríkisstjórnarinnar og íslensku þjóðarinnar um áframhaldandi samband við Bandaríkin, sem Hillary sagðist styðja. „Mig munum vinna að þessu í framtíðinni og ég hlakka til að koma aftur til Íslands,“ sagði forsetafrúin fyrrverandi. Forsetakosningar eru framundan í Bandaríkjunum eins og allir vita og mikið hefur verið rætt um þann möguleika að Hillary kunni að bjóða sig fram eftir fjögur ár, nái John Kerry ekki að sigra Bush í nóvember. „Adam var fyrsti maðurinn svo það kemur ekki til greina,“ sagði Bill Clinton varðandi kosningarnar í haust. „Samkvæmt bandarískum lögum get ég ekki boðið mig aftur fram. Við munum reyna að aðstoða Kerry og við styðjum hann eftir fjögur ár ef hann vinnur í haust,“ sagði forsetinn fyrrverandi. Varðandi hugsanlegt framboð Hillary sagðist Bill styðja allt sem hún vildi gera. Hún hafi hjálpað sér í 27 ár og því ætli hann að hjálpa henni í 27 ár.   Frú Clinton gaf sér tíma til að ræða við nágranna Davíðs í Skerjafirðinum eftir heimsóknina og heilsaði þar á meðal upp á ungan ljósmyndara, Jónas Kristjánsson, sem hafði sérstakan áhuga á eiginmanni hennar. Aðspurður hvort hann vissi hvað Bill gerir sagði Jónas að hann hafi skrifað bók um sjálfan sig og verið forseti Bandaríkjanna í átta ár.  Davíð Oddsson forsætisráðherra segir Bill Clinton og George Bush, núverandi forseta Bandaríkjanna, vera mjög ólíka. Clinton sé afslappaðri maður á vissan hátt og fari víðar og breiða yfir sviðið. Hann hafi mjög gaman af því að velta fyrir sér pólitískum vandamálum enda hafi Clinton „stúderað“ slíkt gríðarlega mikið. Bush komi sér hins vegar beint að efninu. Davíð segir Clinton og Bush tala vel hvorn um annan og telur það ekki aðeins vera vegna þess að þeir séu kollegar í heldur vegna þess að þeir beri töluverða virðingu hvor fyrir öðrum.    Ekki var hægt að sleppa Davíð án þess að spyrja hann um heilsuna og framtíðaráætlanir. Hann svaraði því til að hann ætlaði sér að halda sínu striki og sjá til. Eins og hann hafi áður sagt ætlaði hann að sjá hvað honum ynnist með sína krafta. „Mér finnst einn daginn að mér gangi mjög vel en hinn daginn að ég sé alveg eins og auli og geti ekkert. Svo segir mamma, sem sér mig með viku millibili, að ég hafi heilmikið lagast,“ segir Davíð sem stefnir að því að koma til starfa fyrir 15. september.