SPRON býður sömu kjör og KB banki

SPRON hyggst bjóða íbúðalán sem bera 4,4% vexti líkt og KB banki hefur ákveðið að gera og kynnti í gær. Í tilkynningu frá SPRON segir að viðskiptavinir, sem eru skráðir í fjölskylduþjónustu sparisjóðsins, geti lækkað vaxtagreiðslur sínar enn frekar þar sem skilvísir lántakendur fái endurgreiðslu á hluta greiddra vaxta. Íbúðalán SPRON er verðtryggt langtímalán með allt að 80% veðhlutfalli á fyrsta veðrétti og stendur þeim til boða sem uppfylla lántökuskilyrði. Upphæð lánsins getur þó aldrei orðið hærri en brunabótamat fasteignarinnar segir til um, eins og hjá KB banka.