Hlutverk sjóðsins endurskoðað?

Ef viðskiptabankar geta boðið lán til íbúðakaupa á betri kjörum en Íbúðalánasjóður ber stjórnvöldum að endurskoða hlutverk hans. Þetta segir Guðmundur Bjarnason, forstjóri Íbúðalánasjóðs, sem telur ekki komið að endalokunum enn þrátt fyrir útspil KB banka í gær. KB banki kynnti í gær ný lán til íbúðakaupa eða endurfjármögnunar eldri lána. Íbúðalán KB banka bera 4,4 prósenta vexti en það eru lægri vextir en á lánum opinberu lánastofnunarinnar Íbúðalánasjóðs. Lánin bjóðast til 25 eða 40 ára líkt og lán Íbúðalánasjóðs. Skilyrði fyrir lánveitingu hjá KB banka eru hins vegar þau að þú verður að vera með launareikning hjá bankanum og að auki tvennt af þrennu: greiðslukort, útgjaldadreifingu eða lífeyrissparnað. Lánshlutfall á höfuðborgarsvæðinu er áttatíu prósent af verðmæti hinnar veðsettu eignar en sextíu prósent annars staðar á landinu. Ekkert hámark er á lánsfjárhæð umfram fyrrnefnd hlutföll, utan að aldrei er lánað fyrir hærri upphæð en nemur brunabótamati viðkomandi fasteignar. Almenn íbúðalán Íbúðalánasjóðs geta numið 70% af kaupverði íbúða þegar keypt er í fyrsta sinn, en 65% ef keypt er í annað sinn. Húsbréfalán er að hámarki 9,2 milljónir króna fyrir notaðar íbúðir og 9,7 milljónir fyrir nýjar. Íbúðalánið getur hins vegar ekki farið yfir 85% af brunabótamati. Guðmundur Bjarnason, forstjóri Íbúðalánasjóðs, segir sjóðinn vera opinbera stofnun sem hafi ákveðnu hlutverki að gegna og muni halda því áfram. Þar beri auðvitað hæst það jafnréttishlutverk sem Íbúðalánasjóður hafi, að allir búi við sömu lánamöguleika og sömu kjör. Það er ekki að finna í hinu „nýja tilboði“ frá KB banka segir Guðmundur, enda séu þeir fyrst og fremst í samkeppni við aðra banka og séu með þessu að laða til sín viðskiptavini frá þeim. Guðmundur segir það vekja athygli, og vera fagnaðarefni, ef KB banki hafi efni á því að bjóða þessi vaxtakjör. Aðspurður hvort hann telji ekki að þetta sé upphafið að endalokunum hjá Íbúðalánsjóði segir Guðmundur það vera vilja stjórnvalda að reka stofnun sem geti þjónað landsmönnum á ódýrasta og besta máta. Ef bankakerfið geti hins vegar gert jafnvel eða betur, þá beri stjórnvöldum að skoða þörfina fyrir slíkri stofnun og endurskoða hlutverk Íbúðalánasjóðs.   Hægt er að hlusta á viðtal við Guðmund Bjarnason úr hádegisfréttum Bylgjunnar með því að smella á hlekkinn hér að neðan.