Framsóknarklíka of valdamikil

Elsa B. Friðfinnsdóttir, fyrrverandi aðstoðarkona heilbrigðisráðherra og Framsóknarmaður til margra ára, telur að til sé að verða harður kjarni manna í Framsóknarflokknum sem líði ekki gagnrýni og málefnalega umræðu í flokknum. Hún segir Björn Inga Hrafnsson, aðstoðarmann utanríkisráðherra og Árna Magnússon, félagsmálaráðherra fara þar fremsta í flokki og að völd þeirra séu orðin alltof mikil. Innanflokksdeilur Framsóknarflokksins fara harðnandi frá degi til dags eftir að Halldór Ásgrímsson, formaður flokksins ákvað að víkja Siv Friðleifsdóttur úr ríkisstjórn. Svo virðist sem að minnsta kosti tvær fylkingar takist á í flokknum og í DV var því haldið fram í gær, að til sé nokkurs konar dauðalisti sem menn komist á ef þeir gagnrýni forystuna of hart. Elsa B. Friðfinnsdóttir segir að hún hafi verið búin að heyra af þessum dauðalista tveimur dögum áður en hann birtist í DV. Hún er samvkæmt DV á þessum lista, en segist sjálf ekki hafa neinar beinar sannanir fyrir því að listinn sé til. Hins vegar sé ljóst að það sé ákaflega sterkur hópur eða klíka orðin mjög valdamikil í flokknum. Hópurinn hafi náð undirtökum varðandi uppsetningu á framboðslistum, skipulag varðandi ályktanir og flokkþing. Hún segir að þessi hópur samanstandi af mönnum sem standa næstir formanninum. Til dæmis Björn Ingi Hrafnsson og félagsmálaráðherra. Elsa segir völd þeirra orðin allt of mikil. Það sé engum stjórnmálaflokki hollt að fáir einstaklingar leggi allar línur og séu ráðandi hvaða áherslu eigi að leggja hverju sinni. Elsa segir að meiri breidd þurfi að vera í forystunni til að fá fram ólík sjónarmið. Þannig sé einnig hægt að höfða til flestra kjósenda.