Fundur Framsóknarkvenna færður

Hópur Framsóknarkvenna ætlar að hittast og ráða ráðum sínum í hádeginu í dag vegna þeirrar ákvörðunar Halldórs Ásgrímssonar, formanns flokksins að víkja Siv Friðleifsdóttur úr ríkisstjórn.Upphaflega stóð til að halda fundinn í Iðnó, en eftir að Stöð 2 sagði frá fundinum í fréttum í gærkvöldi ákváðu konurnar að flytja fundinn til og vilja talsmenn þeirra ekki upplýsa hvar hann verður haldinn. Sigrún Jónsdóttir formaður Framsóknarfélags Reykjavíkurkjördæmis suður sagði í samtali við fréttastofu í morgun að til fundarins væru eingöngu boðaðar þær 40 konur sem hefðu ritað undir áskorun á þingflokk Framsóknar sem birtist í Fréttablaðinu í vikunni. Heimildir fréttastofu herma að upphaflega hafi staðið til að boða fleiri konur til fundarins. Sigrún vísar þessu á bug, en heimildarmenn fréttastofu staðhæfa engu að síður að slíkt hafi verið meiningin. Sigrún segir hins vegar að hádegisfundurinn sé nokkurs konar undirbúningur fyrir stórfund Framsóknarkvenna sem halda eigi á miðvikudagskvöld í húsakynnum Framsóknarflokksins á Hverfisgötu í Reykjavík. Mikil óánægja er á meðal kvenna og ungliða í flokknum með brottrekstur Sivjar úr ríkisstjórninni. Jafnréttisnefnd flokksins hefur harmað þessa ákvörðun og segir augljóst að þingflokkurinn hafi ekki haft jafnréttisáætlun Framsóknarflokksins að leiðarljósi og jafnframt brotið lög flokksins, en samkvæmt lögum Framsóknarflokksins skal leitast við að hafa hlut hvors kyns í trúnaðarstöðum fyrir flokkinn ekki minni en 40 prósent. Við brotthvarf Sivjar úr ríkisstjórn verður einungis ein Framsóknarkona ráðherra, sem jafngildir 20 prósentum af ráðherraliði flokksins. Jafnréttisnefndin bendir á að fyrir fjórum árum hafi hlutur Framsóknarkvenna í ríkisstjórn verið 50 prósent og að niðurstaða þingflokksins í fyrradag sé alvarlegt bakslag fyrir þá jafnréttisbaráttu sem háð hafi verið í Framsóknarflokknum.