Kostnaður eykst um 2,4 milljarða

Landssamband íslenskra útvegsmanna telur að hækkað markaðsverð á olíu kunni að fela í sér kostnaðarauka upp á 2,4 milljarða fyrir íslenska útgerð á ársvísu. Að sögn Friðriks J. Arngrímssonar, framkvæmdastjóra LÍÚ, hefur lágt afurðaverð, hátt olíuverð og hátt gengi krónunnar farið saman á síðustu misserum en allir þessir þættir hafa slæm áhrif á rekstrarskilyrði sjávarútvegsins. "Olían er mikilvæg. Þetta er einn stærsti útgjaldaliðurinn okkar, næst stærstur á eftir launum," segir Friðrik. Hann segir olíukostnað vega misþungt eftir tegund veiða og veiðarfæra. Hlutfall olíukostnaðar er einna hæst í veiðum þar sem notast er við troll. "Í einstökum veiðigreinum getur þetta skipt sköpum um hvort veiðar séu arðbærar eða ekki," segir Friðrik. Á mörkuðum í gær fór verð á olíu hátt í fimmtíu dali á tunnu og hefur aldrei verið hærra. Talið er að verð á olíu fari ekki lækkandi á næstunni og muni hugsanlega fara enn hærra sökum ófriðarins í Írak og óvissu í Rússlandi og Venesúela. "Við veltum þessu mikið fyrir okkur fyrir afkomuspá okkar síðast og það er alveg klárt að þetta hefur einhver áhrif á afkomu fyrirtækjanna," segir Ríkharður Daðason hjá greiningardeild KB banka. Hann segir að afkoma Vinnslustöðvarinnar í vikunni hafi verið betri en búist var við og spennandi verði að sjá uppgjör hjá Samherja og HB Granda á næstunni. "Samherji hefur verið að grípa til aðgerða meðal annars með því að láta skipin landa um borð í önnur skip," segir Ríkharður. Ríkharður segir að útgerðarfélögin hafi verið dugleg við að finna leiðir til að lágmarka olíukostnað og annan kostnað til mótvægis við óhagstæð ytri skilyrði. Hann telur þó að ef olíuverð haldi áfram að hækka jafnskart þá muni gagnaðgerðir útgerðarfélaganna ekki duga til og verðþróunin komi niður á afkomu félaganna.