17 ára á 111 innanbæjar

Um miðnætti í gær voru tveir ungir ökumenn teknir fyrir ofsaakstur á Njarðarbraut í Reykjanesbæ að því er vefur Víkurfrétta greinir frá. Drengirnir, sem eru 17 og 18 ára, mældust á 111 kílómetra hraða þar sem leyfilegur hámarkshraði er 50 km. Sá yngri var einungis búinn að vera með réttindi í rúman mánuð en þeir horfa nú upp á háa sekt og tímabundna ökuleyfissviptingu. Fyrr um kvöldið fékk lögreglan tilkynningu um lausagöngu sauðfjár við Vogaveg. Fulltrúum Vatnsleysuhrepps var gert viðvart og segir lögreglan á vef sínum að rétt sé að sauðfjáreigendur kanni hvort kindurnar séu frá þeim. Í gærkvöld var tilkynnt um tvö minniháttar umferðaróhöpp og einn ökumaður var tekinn fyrir of hraðan akstur á Reykjanesbrautinni.