Drengur brenndist í Laugarvatni

Engar merkingar hafa verið við Laugarvatn til að vara fólk við hitalaugum sem geta myndast fyrirvaralaust. Ungur drengur brenndist á fæti þegar hann var að vaða í fjöruborðinu þar í gærkvöldi. Drengurinn, sem er þriggja ára, var ásamt foreldrum sínum á bekk við baðströndina þegar snáðinn ákvað að kanna nánar fjöruborðið. Svo illa vildi til að hitaauga hafði myndast nákvæmlega á þeim stað og drengurinn brenndist illa. Hjúkrunarkona á staðnum gerði að sárum drengsins til bráðabirgða en sjúkrabíll var þegar sendur eftir honum frá Selfossi og til öryggis var neyðarbíll sendur frá Reykjavík.Gert var að sárum hans á brunadeild Landspítalans við Hringbraut. Drengurinn var útskrifaður strax í gær en læknar segja hann hafa hlotið grunnan annars stigs bruna. Ekki var hægt að segja til um hvort einhver varanlegur skaði hlytist af. Engar merkingar voru á þeim stað sem drengurinn brenndist og segir Gústaf Adolf Björnsson, forstöðumaður Íþróttamiðstöðvar Íslands, að merkingar sem eitt sinn voru þar hafi týnst með tímanum. Mikill fjöldi fólks var á Laugarvatni í gær en hins vegar varð enginn annar var við þennan varasama blett í fjörunni. Gústaf segir að skerpt verði á merkingum eftir þetta leiðindaatvik. Þá segir hann að þar sem svæðið sé náttúrulegt megi búast við stöðugum breytingum. Hann segir fólk vera á eigin ábyrgð við vatnið og brýnir fyrir því að fara varlega. Til að mynda sé góð regla að vera í sandölum þegar vaðið er út í vatnið. Lögreglan á Selfossi sér um rannsókn slyssins. Þar segjast menn ekki vita til að hægt sé að draga nokkurn til ábyrgðar en fyrirbyggja verði að slíkt geti endurtekið sig.