Gljúfrasteinn opnaður brátt

Framkvæmdum við safn Halldórs Laxness að Gljúfrasteini er að mestu lokið og verður það opnað fyrir gestum 4. september. Aðstandendur safnsins hafa metnaðarfullar hugmyndir um framtíð þess. Orðið lifandi minning átti vel við þegar Gljúfrasteinn var heimsóttur í dag, á þessum dýrðardegi þegar börn og ferfætlingar léku sér í Köldukvísl og sólin skein inn um glugga hússins. Húsið var reist á sex mánuðum árið 1945 og hafði Auður Laxness umsjón með byggingu þess. Heimili Nóbelsskáldsins hefur fyrir löngu skipað sér sérstakan sess í hugum landsmanna. Margir Íslendingar minnast þess meðal annars að hafa ekið hægt framhjá húsinu í sunnudagsbíltúrnum á Þingvelli og velt því fyrir sér hvort skáldið væri heima, svipast um eftir Jagúarbifreið hans í heimreiðinni og velt vöngum yfir því hvað hann væri að skapa þá stundina. Fyrir rúmum tveimur árum komst húsið í eigu íslenska ríkisins en fjölskylda Halldórs gaf þjóðinni allt innbú, þar á meðal listaverk, bækur og skjöl. Framkvæmdir hafa miðað að því að viðhalda því andrúmslofti sem Halldór og Auður sköpuðu á heimili sínu. Gestir safnsins fá leiðsögn Auðar um húsið í gegnum hljóðupptöku en á henni verður einnig leiklestur, rödd Halldórs Laxness, tónar úr flyglinum í stofunni og fleira. Má segja að það eina sem vanti fyrir utan fólkið sjálft sé vindlalyktin úr horninu. Alla tíð var afar gestkvæmt hjá þeim hjónum og verður leitast við að halda í þann anda, til að mynda með því að halda minniháttar uppákomur í stofunni. Þórarinn Eldjárn, formaður stjórnar Gljúfrasteins, segir nægja að minna á að í stofunni hafi verið mikið um tónleika, meðal annars með mörgum af frægustu tónlistarmönnum heimsins. Hann segir að allt upp í sjötíu manns hafi verið viðstaddir þessa tónleika. Draumurinn er að á Gljúfrasteini megi varðveita minningu skáldsins með lifandi hætti en eftir á að koma í ljós hvort húsnæðið dugar til eða hvort byggja þurfi sérstaka miðstöð til þess að taka á móti gestum. Endurbætur á húsinu hafa kostað um sextíu milljónir króna en stjórn safnsins segir velvild og tilhlökkun hafa einkennt alla þá sem tóku þátt í verkinu. Ekki fleiri en tuttugu gestir geta skoðað heimilið í einu og er miðað við að hver heimsókn taki hálfa klukkustund. Tekið verður á móti gestum í bílskúrnum þar sem hægt verður að skoða nýja margmiðlunarsýningu auk þess sem gestir geta skoðað sig um í fallegu umhverfis hússins. Fáist frekara húsnæði í nágrenninu er stefnt að því að flytja mótttökuna þangað og skapa þar rými fyrir sýningar af ýmsu tagi.