Keyrði inn í matvöruverslun

Maður ók inn um glugga á JL-húsinu við Ánanaust á ellefta tímanum í morgun. Hann var fluttur á slysadeild en ekki hafa fengist upplýsingar um líðan hans. Maðurinn fékk aðsvif og missti í kjölfarið stjórn á jeppabifreið sinni. Hann ók yfir hringtorgið við Ánanaust og þaðan á glugga í verslun Nóatúns í JL-húsinu en stöðvaðist á kanti rétt fyrir innan gluggann. Brunahani sem maðurinn klessti á og brotnaði við áreksturinn tók mesta höggið og því fór einungis fremsti hluti bílsins inn í húsið sjálft. Ekki er vitað hvort viðskiptavinir verslunarinnar hafi verið nálægt glugganum þegar bifreiðin ók inn. Verslun Nóatúns var ekki lokað í kjölfar árekstursins. Sjúkralið var þegar sent á staðinn og var maðurinn fluttur rakleiðis á slysadeild. Engar upplýsingar hafa enn fengist um líðan mannsins. Þá er ekki vitað hvað olli aðsvifinu en að sögn lögreglu er líklegt að um hjartastopp hafi verið að ræða.