Davíð líklega útskrifaður á morgun

Búist er við að forsætisráðherra verði útskrifaður af sjúkrahúsi á morgun. Hann þarf ekki að undirgangast geisla- eða lyfjameðferð vegna þeirra illkynja æxla sem fjarlægð voru. Líklegast er talið að hann taki sæti í ríkisstjórn á ný. Davíð Oddson forsætisráðherra var lagður inn á sjúkrahús seinnipartinn í júlí vegna gallblöðrubólgu. Við rannsókn kom í ljós illkynja æxli í hægra nýra og var nýrað fjarlægt. Síðar kom í ljós að í skjaldkirtli var illkynja mein og var kirtillinn einnig fjarlægður ásamt nærliggjandi eitlum. Engin tengsl voru á milli þessarra tveggja meina og þau voru bæði staðbundin. Forsætisráðherra þarf því ekki að gangast undir lyfja- eða geislameðferð. Batahorfur hans er sagðar mjög góðar. Um 5000 manns í landinu eru með vanvirkan eða óvirkan skjaldkirtil. Arna Guðmundsdóttir er sérfræðingur í efnaskiptasjúkdómum. Hún segir ekki mögulegt að lifa án skjaldkirtils og því verði að gefa skaldkirtilshormón sem kirtillinn framleiðir undir venjulegum kringumstæðum. Ef líkaminn býr til of lítið af hormóninu eða ef skaldkirtillinn hefur verið fjarlægður, hægist á efnaskiptunum, en skaldkirtilshormón stjórnar hraða efnaskipta. Gefið er thyroxin sem er tilbúið hormón. Skammturinn er stilltur af með mælingum. Hún segir það ekki há fólki í daglegu lífi ef það tekur lyfin inn reglulega. Davíð Oddsson fær að öllum líkindum að fara heim af sjúkrahúsi á morgun en verður frá vinnu enn um sinn. Ef fram fer sem horfir mun hann að öllum líkindum taka sæti í ríkisstjórn á ný. Náinn samstarfsmaður segir að hafi Davíð á einhverjum tímapunkti velt því fyrir sér að hætta afskiptum af stjórnmálum hafi veikindin fremur orðið til þess að hann haldi áfram og hætti svo á eigin forsendum og velji sér sjálfur tímann til þess. Ekki er komið á hreint hvaða ráðuneyti Davíð myndi taka að sér. En mörgum finnst liggja beint við að þeir Halldór Ásgrímsson muni einfaldlega hafa stólaskipti og Davíð verði utanríkisráðherra. Hann hefur enn ekki tilkynnt samstarfsfólki sína hvað hann hyggst gera.