Tryggingamiðstöðin áfrýjar dómi

Tryggingamiðstöðin hefur áfrýjað til Hæstaréttar dómi Héraðsdóms Reykjavíkur um að félagið skuli greiða út líftryggingu konu, sem lést þegar henni var ýtt fram af svölum á Kanaríeyjum fyrir um tveimur árum. Fyrir Héraðsdómi neitaði Tryggingamiðstöðin að greiða út tryggingaféð sökum þess að konan hefði verið drukkin þegar hún féll fram af svölum, og það þrátt fyrir að sambýlismaður hennar hefði verið sakfelldur fyrir manndráp af gáleysi og dæmdur til skilorðsbundinnar fangelsisvistar. Félagið bauð aðstandendum tveggja milljóna króna sáttatilboð sem þeir höfnuðu. Fólkið hafði greitt fyrir ferðina til Kanaríeyja með greiðslukorti Visa og konan var einnig með fjölskyldutryggingu hjá Tryggingamiðstöðinni. Aðstandendur hennar fóru því fram á greiðslu dánarbóta að upphæð sjö milljónum króna, sem Héraðsdómur féllst á. Tryggingamiðstöðin unir ekki niðurstöðu Héraðdsóms, sem ekki þarf að koma á óvart. Málið telst fordæmisgefandi og gæti dregið dilk á eftir sér, varðandi bótakröfurétt fólks á hendur tryggingafélögum. Aðstandandi konunnar sagði í samtali við fréttastofu í dag að málsmeðferðin taki mjög á fjölskylduna sem bíður þess eins að málinu ljúki. Hann segist hafa skilning á því að Trygginamiðstöðin vilji gæta hagsmuna sinna, en undrast hins vegar að þeir kjósi að láta reyna á þetta mál fyrir Hæstarétti, þar sem ljóst sé að dauðsfallið varð ekki vegna ástands konunnar. Nóg sé af öðrum málum sem Tryggingamiðstöðin gæti látið reyna á.