Banaslys í Bláa lóninu

Fjórtán ára drengur frá Sviss var úrskurðaður látinn við komu á Landspítalann við Hringbraut í gærdag en hann hafði verið með fjölskyldu sinni í Bláa lóninu. Gestir fundu fyrir drengnum þar sem hann lá meðvitundarlaus á botni lónsins. Drengurinn var flogaveikur en ekki er vitað hvort það hafi með lát hans að gera. "Honum var strax komið upp á bakkann þar sem starfsmenn okkar hófu lífgunartilraunir. Sjúkrabíllinn kom fljótt og tóku sjúkraflutningamennirnir við lífgunartilraununum og fluttu drenginn á brott," segir Anna G. Sverrisdóttir, aðstoðarframkvæmdarstjóri Bláa lónsins. Anna segir drenginn hafa verið skammt frá byggingunni þar sem starfsmenn sjá yfir. Einnig hafi verið mikið af fólki á því svæði en enginn tekið eftir neinu óeðlilegu fyrr en drengurinn fannst. Hún segir starfsmenn Bláa lónsins vera miður sín vegna þessa hörmulega slyss og því miður hafi þau ekki getað komið í veg fyrir það.