Ístak með lægsta tilboðið

Ístak átti lægsta tilboð í nýjan kerskála og aðrar byggingar vegna þriðja áfanga Norðuráls á Grundartanga, þ.e. stækkunar álversins úr 90 þúsund tonnum í 180 þúsund tonn. Tilboðin voru opnuð 29. júlí sl. Tilboð Ístaks var upp á röska 3,2 milljarða króna en hæsta tilboðið, frá Íslenskum aðalverktökum, var rúmlega 3,6 milljarðar. Kostnaðaráætlun verksins var 4,3 milljarðar króna. Þessa dagana er verið að fara yfir tilboðin. Útboðið tók til byggingar kerskála (um 31.000 fermetra), spennistöðva og aðstöðu fyrir loftpressur og blásara (samtals um 900 fermetra). Verkið felur í sér aðstöðusköpun á vinnusvæðinu, jarðvinnu, uppsteypu, forsteyptar einingar, stálvirki, klæðningar, veitukerfi og búnað, almennar lágspennulagnir og frágang innanhúss fyrir nýju byggingarnar. Verkið er áfangaskipt og skal því að fullu lokið eigi síðar en 1. desember 2005. Tilboðin voru annars sem hér segir: Íslenskir aðalverktakar hf: 3.630.820.691 kr. Sveinbjörn Sigurðsson hf: 3.484.111.290 kr. ÞG verktakar ehf: 3.286.527.137 kr. Ístak hf: 3.239.005.771 kr. Hitaveita Suðurnesja og Orkuveita Reykjavíkur eru um þessar mundir að ráðast í byggingu raforkuvera sem nýta jarðhita til framleiðslunnar og munu þessi orkufyrirtæki, auk Landsvirkjunar, sjá álverinu fyrir raforku.