Tekið fastar á aukaefnunum

Í endurskoðaðri reglugerð um merkingar á matvælum með tilliti til hugsanlegra ofnæmisvalda verður tekið fastar á merkingu aukaefna heldur en í gildandi reglugerð, að sögn Helgu Bjarnadóttur, staðgengils forstöðumanns matvælasviðs Umhverfis- og heilbrigðisstofu. Endurskoðun reglugerðarinnar er þegar hafin. "Í nýju reglugerðinni verða meðal annars merkingar á matvælum vegna hugsanlegra ofnæmisvalda teknar sérstaklega til skoðunar," sagði hún, spurð vegna umfjöllunar blaðsins um bráðaofnæmi sem neysla á jarðhnetum getur valdið. Helga sagði að í gildandi reglugerð um merkingar matvæla væri tekið fram, að skylt væri að nefna innihaldsefni og afurðir úr þeim sem gætu valdið ofnæmi eða óþoli. Þar væru jarðhnetur meðal annars taldar upp. "Það er alveg klárt að ef jarðhnetur eru í vörunni þá ber að merkja það sérstaklega," sagði hún. "Hnetutegundir flokkast hins vegar undir hráefni. Hvað aukaefnin varðar, þá segja reglurnar að það þurfi að merkja þau séu þau í vörunni. En í dag er ekkert í reglugerð sem segir til um að taka þurfi fram sé aukaefnið unnið, til dæmis, úr hnetum. Ný reglugerð verður væntanlega þrengd hvað þetta varðar."