Unnið í kapp við tímann

Miklir vatnavextir eru í Jökulsá á Dal, þriðja daginn í röð, og þeir mestu hingað til. Flæðir nú vel yfir brúna. Unnið er í kapp við tímann að hækka varnarstíflu við vinnusvæðið en vinna lagðist niður eftir að vatn lak í gegnum stífluna. Nokkrar skemmdir urðu í gærkvöldi á brúnni. Búast má við flóðum næstu daga. Úrkoma og hlýindi með tilheyrandi jökulbráðnun veldur því að vatn hækkar verulega í ánni á þessum tíma og hefur vatnsflaumurinn aukist dag frá degi. Jökulsá náði upp á brúna í gærkvöldi en um daginn náði vatnsyfirborðið upp undir hana. Brúin hefur verið lokuð og hefur klakaruðningur borist úr Brúarjökli og niður með ánni. Guðmundur Pétursson, verkfræðingur hjá Landsvirkjun, segir að nú undir kvöld hafi áin enn verið að vaxa og vatnið virtist meira en í gær. Brúin skemmdist nokkuð eftir flóðið í gær, það er að segja brúargólfið og handriðið, en burðarvirki brúarinnar er óskemmt. Guðmundur telur að hún eigi að þola meira flóð en í gær, til dæmis eins og það sem nú stendur yfir. Hann segir að gólfið og handriðið hafi verið styrkt og vonast er eftir að brúin standi þetta af sér, jafnvel þótt hún fari á kaf. Umferð yfir brúna hefur verið stöðvuð en það hefur ekki áhrif á starfsemina því allir flutningar fara yfir varnarstífluna, fyrir utan umferð ferðamanna sem ekki komast á staðinn á meðan þetta ástand varir. Eins og fram hefur komið var ákveðið að hækka stífluna um fimm metra og búið er að hækka hana nú þegar um fjóra. Hún verður jafnvel hækkuð um tvo metra til viðbótar. Vatn lak í gegnum hana í gær og var um þriggja metra djúpt vatn á vinnusvæðinu innan við hana. Það þýddi að vinna lagðist niður um tíma, sem og í dag. Stíflan er nú þegar orðin 490 metra há. Háspennukapall liggur meðfram brúnni yfir Jökulsá en að sögn Guðmundar hefur tekist að verja hann. Öðrum kapli verður jafnvel bætt við. Nú síðdegis var flogið yfir Brúarjökul til að kanna jökulröndina. Miðað við veðurspá má búast við áframhaldandi flóðum á næstu dögum samkvæmt Guðmundi. Eins og fram hefur komið hafa önnur af tveimur hjáveitugöngum ekki undan en svo virðist sem stífla sé í þeim. Ekki verður hægt að kanna það fyrr en vatnsmagnið fer niður fyrir 500 rúmmetra á sekúndu, en til viðmiðunar má geta þess að í gær var rennslið, þegar mest var, um 870 sekúndurúmmetrar.