Skjár einn til Bolungarvíkur?

Bolvíkingar ætla að efna til samskota í bænum til að fjármagna uppsetningu á búnaði sem gerir þeim kleift að fylgjast með útsendingum sjónvarpsstöðvarinnar Skjás eins. Forsvarsmenn Skjás eins buðust nýverið til þess að setja upp sendi á Bolungarvík ef heimamenn kostuðu hann til hálfs á móti stöðinni, að því er fram kemur á fréttavefnum vikari.is. Að sögn Helga Jónssonar, rafeindavirkja og áhugamanns um framtakið, mun uppsetning búnaðarins kosta um 1.800 þúsund krónur og yrði hlutur heimamanna því 900 þúsund krónur. Helgi segir að til standi að senda bréf á hvert heimili í Bolungarvík þar sem heimamönnum verður boðið að styrkja verkefnið um fimm þúsund krónur en 900 þúsund króna framlag heimamanna jafngildir einmitt u.þ.b. fimm þúsund krónum á hvert heimili í Bolungarvík. Hann segir að ef upp á vanti verði leitað til fyrirtækja og hugsanlega muni einhverjir einstaklingar láta meira af hendi rakna. Ætlunin sé að flytja merkið um ljósleiðara til Bolungarvíkur þar sem því verði dreift með sendibúnaði líkt og gert er með Stöð 2, Sýn og Ríkissjónvarpið. Það er því ekki ólíklegt að Bolvíkingar geti fylgst með ensku knattspyrnunni og fleiri dagskrárliðum á Skjá einum í vetur.