Mótmæla leðurfatnaði í Gay Pride

Íslenskur dýravinur, hommi, lesbía og Búkolla mótmæltu því á Austurvelli í dag að samkynhneigðir íklæddust leðri. Þau segja að á bak við hverja leðurskó, svipu eða leðurjakka liggi ólýsanleg þjáning dýra og að föt úr gervileðri eða gúmmíi séu jafn kynþokkafull og leðrið.  Það hefur varla farið framhjá nokkrum manni að Hinsegin dagar verða í Reykjavík um næstu helgi. Þá fara hommar og lesbíur um götur og torg í sínu fínasta pússi og mörg þeirra eru mikið fyrir leðrið. Dýravinir eru ekki alveg sáttir við það, þó svo þeir styðji réttindabaráttu samkynhneigðra. Einn þeirra, Magnús Skarphéðinsson, segir áherslu „Gay Pride“ göngunnar á Hinsegin dögum verða sífellt leðurlegri og það hryggi dýravini. Hann segist viss um að það góðhjartaða fólk sem taki þátt í göngunni hafi ekki leitt hugann að því að að baki þessum flíkum liggi mikil þjáning. Aðspurður um aðra hópa sem gangi mikið í leðri, t.a.m. lögregluna, segir Magnús að vissulega þyrfti að taka það í gegn en einhvers staðar verði að byrja. Hann segir leðurnotkun óþarfa, dýra og endingarlitla og til séu gerviefni sem séu flottari, kynþokkafyllri og á allan hátt mannúðlegri. Spurður hvort leðurvörurnar séu ekki komnar af dýrum sem hvort eð er sé slátrað vegna kjötafurðanna segir Magnús þetta hanga á sömu spýtunni. Kjötiðnaður einn og sér gæti aldrei staðið án þess að leðrið væri notað. Ef leðuriðnaðurinn félli niður félli kjötiðnaðurinn niður sömuleiðis. Magnús segir niðurstöðuna vera þá að í hvert skipti sem maður kaupi leðurskó, leðurjakka eða leðurbuxur styðji maður þessa þjáningu.