Vildi bjarga fólkinu

„Ég verð að bjarga fólkinu,“ flaug í gegnum huga Guðjóns Magnússonar vörubílstjóra áður en hann steyptist rúma tíu metra niður í stórgrýti. Guðjón, sem vinnur hjá Bergverki í Borgarnesi, var að flytja möl á stórum fjögurra öxla vörubíl þegar hann kom að einbreiðri brú yfir Laxá í Laxárdal. Hann segist hafa haldið að bíllinn sem kom á móti myndi stoppa fyrir sér en svo var ekki. Guðjón segist ekki hafa getað bremsað því hann var með fullhlaðinn pall aftan á. Eina ráðið til að bjarga fólkinu í hinum bílnum var því að steypa sér fram af brúnni. Aðspurður hvað hafi flogið í gegnum huga hans þegar hann fór fram af brúnni, segir Guðjón það hafa verið að bjarga fólkinu í bílnum. Hann hafi frekar viljað stefna sjálfum sér í hættu. Guðjón steyptist rúma tíu metra niður í stórgrýti og er bíllinn gersamlega ónýtur. Stýrishús vörubílsins mjög illa farið. Guðjón var ekki í bílbelti og þakkar því lífgjöfina að hann slengdist yfir í farþegasætið í fallinu. Eftir fallið skreið hann sjálfur út um framrúðu bílsins. Aðspurður hvort fólk hafi ekki verið hissa þegar það sá hann standandi hjá bílflakinu segist Guðjón reyndar hafa lagst niður í grjótinu og orgað. Vegfarendur hafi svo komið honum til hjálpar skömmu síðar. Guðjón var fluttur í skyndi í sjúkrabíl til Reykjavíkur en þegar rætt var við lækni á slysadeild Landsspítala-háskólasjúkrahúss í gær sagði hann með ólíkindum að Guðjón skyldi sleppa eins vel og raun bar vitni. Hann var útskrifaður af sjúkrahúsinu í gærkvöldi, óbrotinn með nokkra yfirborðsáverka.