3 kíló af amfetamíni í Dettifossi

Þrjú kíló af amfetamíni fundust í Dettifossi, skipi Eimskipafélagsins. Sjaldan hefur verið lagt hald á jafn mikið af efninu. Söluverðmæti þess gæti numið á fjórða tug milljóna króna. Rannsókn málsins er á mjög viðkvæmu stigi að sögn lögreglu og verst hún því allra frétta af henni. Þó er staðfest að þrjú kíló af amfetamíni fundust í Dettifossi. Það fæst ekki uppgefið hvort fíkniefnin hafi verið í farmi skipsins eða í skipinu sjálfu. Dettifoss siglir til Þórshafnar í Færeyjum, Rotterdam, Hamborgar, Árósa, Gautaborgar og Fredrikstad. Enginn hefur verið handtekinn vegna málsins en samkvæmt heimildum fréttastofu er nokkuð síðan fíkniefnin fundust, það er, ekki við síðustu heimkomu skipsins. Þetta er eitt mesta magn amfetamíns sem haldlagt hefur verið í einu lagi. Ekki er vitað um hreinleika efnisins ennþá en að öllum líkindum má telja það nokkuð hreint miðað við hversu stór sendingin var og því hægt að drýgja það töluvert. Miðað við verðskrá SÁÁ er ekki talið óvarlegt að ætla að götuverð efnisins, þegar búið er að drýgja það, sé á fjórða tug milljóna króna.