Bráðabirgðastífla hækkuð um 5 m

Ákveðið hefur verið að hækka bráðabirgðastíflu við Kárahnjúka um fimm metra vegna stíflunar í hjárennslisgöngum fram hjá virkjanaframkvæmdunum á svæðinu. Göngin eiga að veita vatni fram hjá endanlegu stíflumannvirki á meðan það er í byggingu. Stórt lón myndaðist í gærkvöldi ofan við bráðabirgðastíflugarð sem á að beina rennslinu inn í göngin og verja vinnusvæðið við aðalstífluna vatnsaga. Fulltrúar Landsvirkjunar hafa verið fengnir á staðinn til að finna út hvað veldur stífluninni í göngunum. Sem stendur er það erfitt enda göngin full af vatni. Líklegt er talið að grjóthrun eða lofttappar inni í göngunum valdi því að þau skili ekki lengur því vatnsmagni sem gert er ráð fyrir. Eins og komið hefur fram í fréttum hljóp vöxtur í Jökulsá á Dal síðdegis í gær og um klukkan hálf sjö var brúnni við fremri Kárahnjúk lokað, enda var vatnsyfirborðið þá alveg að ná upp í brúargólfið og farið var að skola úr fyllingum við brúarendana. Nú hefur brúin hins vegar verið opnuð á nýjan leik.