3 kíló af amfetamíni haldlögð

Fíkniefnadeild lögreglunnar í Reykjavík og Tollgæslan í Reykjavík hafa lagt hald á þrjú kíló af amfetamíni sem smyglað var til landsins með Dettifosi en andvirði þess gæti numið yfir 30 milljónum króna. Ásgeir Karlsson, yfirmaður fíkniefnadeildar lögreglunnar, segist á þessu stigi ekki upplýsa frekar um málið eða hvort efnið kom í vörusendingu eða var falið í skipinu sjálfu. Hann staðfestir þó að engin hafi verið handtekinn vegna rannsóknar málsins en lætur ekkert uppi um það hvort einhverjir hafi verið yfirheyrðir. Þetta er eitthvert mesta magn af amfetamíni sem fundist hefur í einu til þessa. Samkvæmt upplýsingum SÁÁ um gangverð á fíkniefnum er götuverð á amfetamíni nú u.þ.b. fjögur þúsund krónur fyrir grammið. Ef efnið er hreint, eins og oftast er raunin í stórum sendingum, má drýgja það mikið og fá mikið meira en þrjú kíló út úr sendingunni. Smásöluverðmæti efnisins gæti þannig hlaupið á 30-40 milljónum króna. Talsverða fjármuni hefur því þurft til að leggja út fyrir efninu erlendis en Dettifoss var meðal annars að koma frá Hollandi þar sem mikil fíkniefnaviðskipti eru.