Slapp ótrúlega lítið meiddur

Ökumaður á stórum malarflutningabíl slapp ótrúlega lítið meiddur eftir að hann ók út af brúnni yfir Laxá í Laxárdal í gær og bíllinn hafnaði á hvolfi í grýttum árfarveginum, meira en tíu metrum neðar. Ökumaðurinn var fluttur í sjúkrabíl á slysadeild Landspítalans í Reykjavík. Tildrög voru þau að vörubílnum og jeppa, með fjórum manneskjum í, var ekið samtímis inn á einbreiða brúnna. Svo virðist sem ökumaður vörubílsins hafi gripið til þess ráðs, fremur en að lenda beint framan á jeppanum, að sveigja út af brúnni og rakst vörubíllinn aðeins lítillega utan í jeppann. Enginn slasaðist í honum. Hægt er að sjá myndir af vettvangi og viðtal við lögreglumann úr morgunsjónvarpi Stöðvar 2 með því að smella á hlekkinn hér að neðan.