Lítil stemning á heimleið úr Eyjum

Nokkur hundruð strandaglópar framlengdu Þjóðhátíðina í Vestmannaeyjum um sólarhring, þar sem þoka kom í veg fyrir flug. Verulega var dregið af ungum Þjóðhátíðargestum sem komu með Herjólfi í dag, eftir annasama skemmtanahelgi. Þjóðhátíðargestirnir á flugstöð Vestmannaeyja reyndu að láta fara vel um sig í gær þar sem þeir biðu eftir að þokunni létti og flug gæti hafist. Margir voru algjörlega uppgefnir og sváfu vært. En ekkert var flogið, og gistu tæplega 200 manns í íþróttahúsi bæjarins um nóttina. Biðin hófst svo á ný í morgun. Það varð þó til að stytta mönnum stundir að fyrsta lundapysja sumarsins kíkti í heimsókn. Um hádegið rofaði loks til, strandaglópum til mikillar gleði. Þeir sem áttu pantað far með Herjólfi áttu hinsvegar greiða leið heim, og var troðfullt með fyrstu ferð í dag. Ansi var þó lágt risið á unga fólkinu eftir annasama helgi við skemmtanahaldið, og því fer litlum sögum af stemmningu um borð.