Fleygði líkinu og fór í búðir

Sænskum póstpoka með gínu, fötum, grjóti og kúbeini var varpað í fjöruna við Presthúsatanga við Hofsvík þar sem Hákon Eydal segist hafa komið líki Sri Rahmawati fyrir. Hákon banaði Sri með kúbeini og segist hafa komið morðvopninu ásamt líkinu fyrir í sænskum póstpoka sem hann hnýtti fyrir með taubuxum. Pokinn sem settur var í fjöruna í gær er um 75 kíló af þyngd og var reynt að líkja eins nákvæmlega eftir innihaldi pokans og hægt var samkvæmt frásögn Hákonar. Pokinn lenti í fjörunni, nokkrum metrum frá flæðarmálinu en það var nærri því háfjara eins og var þegar Hákon losaði sig við líkið. Þá var veður einnig mjög svipað og það var sunnudaginn örlagaríka fyrir mánuði síðan. Seinni partinn í gær var farið að flæða að og pokinn kominn í kaf. Björgunarbáturinn Ásgrímur S. Björnsson mun fylgjast með pokanum og rekaldinu og kortleggja hreyfingu þeirra í sjónum. Landsbjörg sá um að útbúa pokann og eru allir hlutir í honum merktir Slysavarnarfélaginu Landsbjörg svo ekki verði villst á þeim og því sem var í pokanum sem líkt var eftir. Ef einhverjir verða varir við merktu hlutina eru þeir beðnir um að hafa samband við lögreglu eða Landsbjörg. Þá var einnig sett út rekald, trjádrumbur með áfastri bauju, til að sjá hvert hlutir úr pokanum gætu hugsanlega rekið, ef pokinn hefur opnast eða rifnað. Ef pokinn hefur opnast gerir það allar getgátur um hvar líkið gæti verið að finna mun erfiðari.