Skin og skúrir í Vestmannaeyjum

Vinsælasta útihátíðin þetta árið er hátíðin Ein með öllu á Akureyri en talið er að um 16 þúsund gestir séu í bænum þessa Verslunarmannahelgi. Ágætis veður hefur verið fyrir norðan sem skýrir án efa aðsóknina. Bragi Bergmann sem er í forsvari fyrir hátíðina segir með ólíkindum hve vel allt hafi gengið. Það hafi verið talsverð ölvun sem hægt hafi verið að búast við miðað við fjölda gesta. Bragi taldi að þetta væri stærsta úthátíð sem haldin hefur verið hér á landi. Tólf eða fjórtán fíkniefnamál hafi komið upp, en þau hafi öll verið minni háttar. Þrír voru teknir fyrir grun um ölvun við akstur. Vestmanneyingar eru þekktir fyrir að vera ánægðir með sína Þjóðhátíð sama á hverju gengur. Um sjö þúsund manns eru á Þjóðhátíð og lék veðrið við gesti í gær. Í morgun var rigning og slagviðri en nú er hins vegar farið að stytta upp og heiðskýr himinn blasir við gestum Herjólfsdals. Páll Scheving er framkvæmdastjóri ÍBV, sagði vonda veðrið ekki hafa skollið á fyrr en seint um nóttina og íþróttahúsið var opnað í morgun fyrir þá sem vildu leita skjóls. Tíu þúsund manns eru á unglingalandsmóti UMFÍ á Sauðárkróki nú um helgina. Þar hefur allt verið með friði og spekt og fólk virðist hafa skemmt sér hið besta í ljómandi veðri. Unglingarnir hafa keppt í hinum ýmsustu íþróttagreinum og boðið hefur verið upp á skemmtanir á kvöldin en allt gengið áfallalaust fyrir sig að sögn mótshaldarar. Í morgun var blankalogn á Sauðarkróki og rjómablíða. Mótinu lýkur í kvöld með flugeldasýningu. Hátíðin Neistaflug er haldin í Nesskaupsstað um helgina og eru þar á þriðja þúsund aðkomumenn að sögn lögreglu. Þar eins og annars staðar virðast hátíðahöld hafa gengið vel og allir skemmt sér í mesta bróðerni. Þeir höfuðborgarbúar sem ákváðu að sitja heima höfðu nóg við að vera en aðsóknarmet var sett í Fjölskyldu og húsdýragarðinum. Þangað komu 17 þúsund gestir í gær, tvö þúsund yfir daginn og fimmtán þúsund manns hlýddu á Stuðmenn spila um kvöldið. Veður var gott og allir skemmtu sér hið besta að sögn viðmælenda fréttastofu.