Hreyfing á menntamálum geðsjúkra

Hreyfing virðist vera komin á menntamál geðsjúkra, að sögn Helga Jósefssonar forstöðumanns samstarfsverkefnis Fjölmenntar og Geðhjálpar. Hann hefur verið boðaður á fund í menntamálaráðuneytinu í dag. Er þess vænst að eftir þann fund verði hægt að tilkynna þeim 115 einstaklingum sem sótt hafa um, að þeir geti haldið áfram námi sínu á næstu önn. Helgi á von á 30 - 40 umsóknum til viðbótar ef skólanum verður gert kleyft að starfa áfram í haust. Skólinn hefur verið í lausu lofti síðan í maí, þegar segja varð upp öllum kennurum og starfsfólki, þar sem fjárveitingar fyrir næsta skólaár lágu ekki fyrir að hálfu stjórnvalda. Á annað hundrað manns hafa því beðið í óvissu í þrjá mánuði. Þóra Kristín Vilhjálmsdóttir, sem stundað hefur nám í skólanum sagði í blaðinu í gær, að skólinn hefði gjörbreytt lífi sínu. Þóra Kristín er með geðhvarfasýki, sem veldur þunglyndi. Hún kvaðst að mestu laus við einkennin eftir að hún hóf skólanám. Að sögn Helga hefur skólinn verið starfræktur í þrjár annir. Námið er byggt upp þannig, að það sé hagnýtt. Til dæmis getur fólk lagt stund á ensku, dönsku, stærðfræði, bókfærslu og tölvunotkun. Fjölmennt er í samstarfi við Fjölbrautaskólann í Ármúla, sem býður fólkinu upp á fjarnám. "Margir hafa náð tökum á sínu lífi í náminu," sagði Helgi. "Ég hef dæmi af einstaklingi sem sótti fyrstu tvær annirnar, fór síðan í framhaldsskóla og lauk þar prófum í vor með miklum glæsibrag. Þessi einstaklingur var búinn að vera veikur í 15 ár. Ég hef fleiri ámóta dæmi á takteinum." Þegar farið var af stað með námsverkefnið, var ákveðið að það yrði einingabært ef fólk hefði heilsu og löngun til. Þá hefði verið gerður samningur við Fjölbrautaskólann í Ármúla. Ólafur Sigurbjörnsson aðstoðarskólameistari vildi síðan stíga skrefið til fulls, með því að bjóða þessu fólki upp á fjarnám. Allnokkrir hafa tekið áfanga í Ármúla í tungumálum, stærðfræði og sálfræði, svo dæmi séu nefnd. Helgi sagði, að námsverkefnið væri með faglegan bakhóp, sem skipaður væri yfirlækni geðsviðs Landspítala, félagsráðgjafa frá Kleppi, sálfræðingi frá Grensásdeild og geðhjúkrunarfræðingi frá Rauða krossinum. Til þessa hóps væri hægt að leita ef upp kæmu spurningar.