Viðbúnaður í Vestmannaeyjum

Viðbúnaður var á Vestmannaeyjaflugvelli á sjöunda tímanum í gærkvöldi þegar flugvél Flugfélags Vestmannaeyja kom inn til lendingar eftir að ljós hafði sýnt að ekki voru öll hjól læst. Slökkvilið flugvallarins og Vestmannaeyjabæjar var í viðbragðsstöðu og á meðan reyndi flugmaðurinn að setja hjólin niður og upp aftur nokkrum sinnum. Við það kviknuðu öll ljós sem sýndu að öll hjól voru í læsingu. Um klukkan sjö lenti vélin svo heilu og höldnu. Í vélinni voru átta farþegar og einn flugmaður. Þetta er í annað skiptið í vikunni sem viðbúnaður er á flugvellinum vegna vandræða með hjólabúnað flugvéla. Í fyrra skiptið var það vél Íslandflugs sem lenti svo heilu og höldnu á þriðjudagsmorgun. Meðfylgjandi mynd var tekin þegar vélin var lent og farþegar gengu frá borði. Myndin er birt með góðfúslegu leyfi Eyjafrétta.