Bylgjan vinsælasta útvarpsstöðin

Bylgjan er vinsælasta útvarpsstöð landsins og fer í fyrsta sinn yfir Rás 2 samkvæmt nýrri útvarpskönnun Gallups. Stöðvarnar hafa verið mjög jafnar í útvarpskönnunum undanfarið ár. Í könnun á útvarpshlustun í júní fer Bylgjan í fyrsta sinn yfir Rás 2 þegar litið er á alla aldurshópa á öllu landinu. Rúm 63 prósent landsmanna hlusta á Bylgjuna en Rás 2 er með 61,5 prósent hlustun. Dagbókarkönnunin var gerð dagana 18.-24. júní, úrtakið var tæplega 1300 Íslendingar á aldrinum 12-80 ára. IMG Gallup sendir dagbækur heim til svarenda og var hringt í þá einu sinni til þrisvar yfir könnunartímabilið til að tryggja sem besta þátttöku. Um helmingur þátttakenda svaraði könnuninni. Bylgjan er vinsælust í aldurshópnum 12-19 ára, rétt yfir FM957. Bylgjan er langvinsælust hjá fólki yfir tvítugt en þegar yfir fertugt er komið fer Rás 2 yfir Bylgjuna. Svo jafnt er á með stöðvunum að þegar litið er á meðalhlustun yfir virka daga og meðalhlustun yfir helgar er Rás 2 vinsælli, en þegar uppsöfnuð hlustun er tekin saman fyrir alla vikuna hefur Bylgjan vinninginn. Þriðja vinsælasta útvarpsstöðin á landinu er Rás 1 með 47 prósenta hlustun, í fjórða sæti er Létt 96,7 með 24 prósent og svo til jafnar í fimmta sæti eru Útvarp Saga og FM957 með rétt rúm 23 prósent.