Brunavarnir skóla í slæmu ástandi

Brunavarnir í framhaldsskólum landsins eru í slæmu eða óviðunandi ástandi í tæplega 30 prósentum tilvika. Þetta kemur fram í nýrri ársskýrslu Brunamálastofnunar. Björn Karlsson brunamálastjóri segir að á þessu séu ýmsar skýringar. Einkunnakerfi Brunamálastofnunar sé mjög einfalt og gefi tíðum ýkta mynd af ástandinu. Kerfið sé hins vegar mikilvægt til að bera saman þróun brunavarna á milli ára. Björn segir þó ljóst að einkunnin „slæmt“ eða „óviðunandi“ þýði að gera þurfi endurbætur á brunavörnum.  Hann segir menn oft vera með tímabundnar lausnir sem Brunamálastofnun taki ekki tillit til í sínu einkunnakerfi. Björn segir að í tæplega 30 prósent tilfella verði að gera umbætur og í flestum tilvikum séu menn með langtímaáætlun sem þeir hafi sýnt eldvarnaeftirlitinu. Aðspurður hvort það sé nógu gott að brunavarnir séu í slæmu eða óviðunandi ástandi í svo mörgum skólum segir Björn það alls ekki viðunandi. Hann segir að ástandið hafi þrátt fyrir þetta batnað á síðustu sex árum og bendir ennfremur á að skólar séu beittir viðurlögum verði ekki gerðar viðunandi betrumbætur á brunavörnum. Í ársskýrslu Brunamálastofnunar kemur ennfremur fram að ástand brunavarna er slæmt í tæplega helmingi gistihúsa landsins. Björn segir að það sé reyndar hvergi „óviðunandi“ samkvæmt einkunnakerfi Brunamálastofnunar. Þarna komi hins vegar í ljós að ástand gistihúsa hafi lítið batnað síðan árið 1997 en í farvatninu sé að gera bragarbót þar á. Aðspurður hvort menn fái leyfi til þess að opna gistihús án þess að geta tryggt algjörlega brunavarnir og þannig öryggi gesta sinna segir Björn að það sé til í dæminu, m.a. með tímabundnum lausnum eins og sólarhringsvakt. Þeir fái aftur á móti lélega einkunn í hinu „einfalda“ kerfi Brunamálastofnunar. Hægt er að hlusta á viðtal við Björn úr hádegisfréttum Bylgjunnar með því að smella á hlekkinn sem fylgir fréttinni.