Meðferð tillagna í nefnd gagnrýnd

Átakshópur Höfuðborgarsamtakanna og Samtaka um betri byggð gagnrýnir harðlega meðferð sem miðlunartillögur hópsins að endurbótum að framkvæmdaáætlun vegna færslu Hringbrautar fengu í samgöngunefnd Reykjavíkurborgar. Tillögur átakshópsins ganga í fyrsta lagi út á að Hringbraut verði sett í opinn stokk sem síðar mætti loka. Þá hefur hópurinn sett fram tillögur um hringtorg ofan á mislægum gatnamótum á mótum Snorrabrautar og Bústaðavegar. Ólafur F. Magnússon setti fram tillögu í borgarráði um láta að gera kostnaðarúttekt og grein fyrir því hvernig tillögurnar falli að öðru skipulagi. Tillögunni var vísað til umsagnar borgarverkfræðings sem gagnrýndi tillögurnar tvær. Átakshópurinn telur hins vegar að þeir aðilar sem komu að mati tillagnanna hafi "litið fram hjá augljósum og veigamiklum meginkostum beggja tillagna en einbeitt sér að smávægilegum hnökrum og uppskálduðum göllum," að því er fram kemur í andsvörum þeirra. "Það hefur á allan hátt verið staðið eðlilega að færslu Hringbrautar með auglýsingum og öllu tilheyrandi," segir Alfreð Þorsteinsson, borgarfulltrúi Reykjavíkurlistans. "Því miður ganga tillögur átakshópsins bara ekki upp."