Sómabáturinn fannst

Sómabátur, sem datt úr sjálfvirku kerfi Tilkynningaskyldunnar, fannst fyrir tæpri klukkstund norðvestur af Snæfellsnesi. Björgunarskip Slysavarnafélagsins Landsbjargar, Björg frá Rifi, hraðbjörgunarbátur björgunarsveitarinnar frá Ólafsvík ásamt þyrlu Landhelgisgæslunnar voru kölluð út á þriðja tímanum til að grennslast fyrir um sjö tonna Sómabát en síðast var vitað um hann um 13 sjómílur norðvestur af Snæfellsnesi. Ekkert samband náðist við Sómabátinn og svaraði hann hvorki fjarskiptaköllum Tilkynningarskyldunnar né í síma. Klukkan 16:10 fann þyrla Landhelgisgæslunnar Sómabátinn á svipuðum stað og síðast var vitað um staðsetningu hans og var hann þá á siglingu og allt virtist í lagi hjá honum.Ekki er vitað hvers vegna báturinn datt út úr sjálfvirku tilkynningarskyldunni né af hverju ekkert samband náðist við hann en talsmanni Landsbjargar finnst líklegt að einhverjar bilanir hafi orðið um borð.