Ranglega dæmd fyrir kynferðisbrot?

Karl og kona í Færeyjum kunna að hafa verið ranglega dæmd fyrir kynferðisbrot gegn börnum. Áfrýjunardómstóll í Danmörku hefur ákveðið að málið verði tekið fyrir aftur. Hin dæmdu hafa hins vegar afplánað dóma sína, annars vegar tveggja ára og hins vegar níu mánaða fangelsi, sem felldir voru fyrir fjórum árum. Björn á Heygum í Þórshöfn, verjandi mannsins, segir í samtali við Berlingske Tidende margt benda til að ákæruvaldinu og dómstólunum hafi orðið illilega á. Sakborningarnir neituðu alltaf sök en börnum þeirra, þremur börnum konunnar og einu barni mannsins, var trúað. Börnin hafa nú viðurkennt að hafa sagt ósatt að undirlagi ofbeldisfullrar stjúpmóður sinnar. Þau eiga yfir höfði sér ákæru fyrir rangar sakargiftir.