Annir hjá lögreglunni á Suðurlandi

Miklar annir eru hjá lögreglunni á Suðurlandi en þangað liggur nú straumurinn frá borginni. Þar segjast menn vera viðbúnir öllu þessa helgi. Ríkislögreglustjóri hefur lagt til mannafla og tækjabúnað en öflugar öryggismyndavélar eru notaðar við löggæslu á landsmótssvæðinu á Gaddstaðaflötum. Þeir hafa líklega andað léttar, löggæslumennirnir á Suðurlandi, þegar fréttist að engin merki sjáist um gosóróa undir Mýrdalsjökli eftir skjálftann sem varð þar í nótt, á sama tíma og þeir bjuggu sig undir eina mestu ferðahelgi ársins. Þeir segjast þó vera með aðgerðaráætlun viðbúna komi til þess að frekari skjálftar ríði yfir, nú eða ef Katla lætur á sér kræla. Nú seinnipartinn var viðstöðulaus straumur bíla úr borginni um Suðurlandsveg og lögreglan telur að meirihluti fólks sem leggur land undir fót sé á leið til Þórsmerkur, að Skógum eða á Humarhátíð á Hornafirði. Langflestir beygja þó við afleggjarann að Gaddstaðaflötum þar sem Landsmót hestamanna er haldið. Þar er sprotin upp mörg þúsund manna byggð og viðbúnaður lögreglu er í samræmi við mannfjöldann. Um 30 manna lið frá ýmsum umdæmum er á svæðinu. Rólegt hefur verið að því frátöldu að 10 grömm af kókaíni og amfetamíni, og smáræði af öðrum fíkniefnum, fundust á mótssvæðinu í gærkvöld. Þar kom ein eftirlitsmyndavélanna að góðum notum.