Ósammála um leyfisveitingu

Ólafur Helgi Kjartansson, sýslumaður á Selfossi, neitar að hafa veitt Gunnars majónes leyfi til þess að reisa þriggja metra háa majónesdós við Suðurlandsveg, rétt vestan Þjórsár. "Það hefur ekkert leyfi fengist hér og hefur ekki verið leitað til byggingarnefndar," segir Ólafur. Að sögn Ólafs er óheimilt samkvæmt náttúruverndarlögum að setja upp auglýsingar meðfram vegum og annars staðar utan þéttbýlis. Þó sé heimilt að uppfylltum ákvæðum annarra laga að setja upp látlausar auglýsingar um atvinnurekstur, þjónustu eða vörur á þeim stað sem slík starfsemi fer fram. Telur Ólafur að majónesdósin uppfylli ekki þau skilyrði. "Þetta er af þeirri stærð að ég tel að málið heyri undir byggingarnefnd viðkomandi sveitarfélags," segir Ólafur. "Því virðist sem dósin sé ekki löglega uppsett og verður málið skoðað." "Það var talað við sýslumann sem sagði að við réðum hvað við gerum inni á okkar landsvæði," segir Helen Gunnarsdóttir, eigandi Gunnars majónes. Þá bendir Helen á að majónesdósin hafi verið flutt austur í lögreglufylgd. "Þetta er líklega bara innanhússmál í sveitinni hjá þeim."