Mestu útflutningstekjurnar

Á sama tíma og Frakkar státa sig af útflutningi eðal vína, Suður Afríkumenn af demantaútflutningi og Hollendingar af útflutningi á rósum er blautverkaður saltaður þorskur sú sjávarafurð, sem skilaði Íslendingum mestum útflutningstekjum í fyrra. Sá útflutningur skilaði íslensku þjóðarbúi tólf og hálfum milljarði króna, samkvæmt skýrslum Hagstofunnar. Þetta eru magntölur, en einingaverðið á kíló er líka hátt þótt það nái hvergi nærri eðaltegundum eins og humri. Um það bil helmingur útflutningstekna vegna fiskveiða fengust fyrir ýmiskonar frystar afurðir og er Evrópska efnahagssvæðið lang mikilvægasta markaðssvæðið. Þangað eru þrír af hverjum fjórum fiskum seldir fyrir rúmlega 86 milljarða króna. Heildarútflutningur sjávarafurða í fyrra nam rúmlega 800 þúsund tonnum og fengust tæpir 114 milljarðar fyrir þau. Það er í magni til um það bil hálfs prósents samdráttur  og í verðmætum nemur það 11,6 prósentum, eða á milli 12 og 13 milljörðum króna.