Baráttustig hjá Sviss gegn Króatíu

Svisslendingar og Króatar gerðu í gær markalaust jafntefli í fyrsta leik B-riðils á Evrópumótinu í Portúgal. Bæði lið hljóta að vera óhress með úrslitin því sigur hefði gefið liðunum gott veganesti fyrir leikina gegn Frökkum og Englendingum í næstu umferð. Svisslendingar þurftu að hafa meira fyrir stiginu því þeir léku einum manni færri síðustu fjörutíu mínútur leiksins. Miðjumaðurinn snjalli Johann Vogel fékk að líta rauða spjaldið á 49. mínútu þegar hann krækti sér í annað gult spjald. Leikurinn var fjörugur í fyrri hálfleik og fengu Króatar nokkur góð færi til að skora. Framherjinn Ivica Olic fékk besta færið en hann skallaði í slána af stuttu færi. Svisslendingar voru jafnvel hættulegri eftir að þeir voru orðnir einum manni færri og sóknarmaðurinn Alexander Frei átti þrumuskot sem Tomislav Butina, markvörður Króata, varði naumlega.