Skaut af haglabyssu á tvö hús

Maður vopnaður haglabyssu skaut á tvö hús á Reykhólum í Barðastrandasýslu í gærmorgun. Sérsveit Ríkislögrelustjóra var kölluð vestur, en maðurinn finnst hvergi. Þórólfur Halldórsson er sýslumaður á Patreksfirði. Hann upplýsti að maður sem talið var að væri í annarlegu ástandi hefði skotið á tvö hús. Þá var talið að hann hefði farið inn í annað hús og búið þar um sig. Þá var leitað aðstoðar sérsveitar ríkislögreglustjóra til að afvopna manninn. Þegar sérsveitin réðst til inngöngu reyndist húsið vera mannlaust en skotvopnin voru til staðar og lagt var hald á þau. Maðurinn hefur ekki fundist en vitað er hver hann er. Hann býr ekki á staðnum en kemur þar stundum. Engin skipuleg leit er að manninum en málið verður skoðað í rólegheitum. Þórólfur sagði aðal atriðið að vopnin væru fundin og að ekki stafaði hætta af manninum af þeim sökum. Vitað var af fólki í öðru húsinu sem maðurinn skaut á en ekki vitað hvort maðurinn þekkti til fólksins.