Kallar á uppbyggingu þjóðvega

Formaður samgöngunefndar Alþingis segir það mikið áhyggjuefni að Eimskip skuli hætta strandflutningum frá og með 1. desember næstkomandi. Það kalli á hraðari uppbyggingu á þjóðveginum. Skipulagsbreytingar eru fyrirhugaðar hjá Eimskipum til þess að bæta þjónustu félagsins og mæta auknum kröfum. Efla á landflutninga félagsins og samkvæmt því munu strandsiglingar Eimskipa heyra sögunni til frá og með 1. desember næstkomandi. Guðmundur Hallvarðsson, formaður samgöngunefndar Alþingis, segir það óæskilega þróun. Hann segir þetta áhyggjuefni. Eimskip segi þetta ekki þýða nema fimm til tíu bíla aukningu hjá þeim og þeir muni nota þann bílaflota sem fyrir er og nýta rými betur. Þetta segir Guðmundur þýða meiri þunga á vegunum og það séu um 100 þúsund tonn sem bætist við vegakerfi sem ekki sé of gott fyrir. Þetta þýði að leggja þurfi meiri áherslu á þjóðveg eitt, þar sem enn á eftir að tvöfalda á sjöunda tug brúa. Þá telur Guðmundur þessa þróun geta haft slæm áhrif á Vestfirði. Eitt skip sé enn undir íslenskum fána, Jaxlinn, sem flytji vörur frá Hafnarfirði til Vestfjarða. Vestfirðingar hafi fullyrt við Guðmund að það sé 50 prósent ódýrara að flytja vörur sjóleiðis með Jaxlinum heldur en með landflutningabílum. Þetta kalli því fram ótal spurningar.