Stórkostleg upplifun

Ólympíuleikarnir voru settir í 28. sinn í Aþenu í gærkvöld. Setningarhátíðin þótti takast sérstaklega vel. Þetta telst hafa verið ein stærsta sýning sem sett hefur verið upp með yfir fjögur þúsund listamenn. Björk Guðmundsdóttir var í stóru hlutverki en hún söng lag sitt Oceania, óð til sjávarins sem ekki gerir greinarmun á lýði eða löndum. Kristján Arason, handboltakappi með meiru, var á setningarhátíðinni í gær ásamt eiginkonu sinni, Þorgerði Katrínu Gunnarsdóttur menntamálaráðherra. Kristján segir Björk hafa verið glæsilega og staðið sig mjög vel. Hann segist hafa fundið fyrir töluverðu stolti að eini söngvari athafnarinnar hafi verið Íslendingur og fólk í kring skildi ekki af hverju hann hafi alltaf verið að standa upp að klappa fyrir Björk og taka myndir af henni.   Kristján segir það hafa verið stórkostlega upplifun að vera viðstaddur opnunarhátíðina en þetta er ekki í fyrsta sinn sem hann er viðstaddur opnunarhátíð Ólympíuleikanna. Hann keppti með handboltalandsliðinu á tvennum leikum, í Los Angeles 1984 og í Seoul 1988. Kristján segir mun á því að ganga sjálfur inn á leikvanginn eða vera á áhorfendapöllunum. Geðshræringin við það að koma inn á Ólympíuleikvang í svona athöfn er gjarnan mikil en þá sér maður hins vegar ekki sýninguna líkt og Kristján gerði í gær.     Kristján ætlar á leik handboltalandsliða Íslands og Króatíu sem hefst klukkan hálf fimm að íslenskum tíma. Aðspurður hvort það sé ekki erfitt að sitja upp í stúku þegar landsliðið keppir segir Kristján þá tilfinningu lögnu vera farna. Nú hafi hann bara gaman að því að horfa á og segir allt geta gerst í leiknum við heimsmeistarana á eftir.  Hægt er að hlusta á viðtal við Kristján Arason með því að smella á hlekkinn hér að neðan.